مشهد ليلي ف غرفة الصالون واتنين مخطوبين ( عادل و ندى )
هي : ( تدير دفة الكلام بعيدا عن السياسه ) دولا .. تعرف إيه أكتر حاجه بحبها ؟
هو : ........... ف إيه بالظبط ..الأكل ولا الشرب ولا ...
هي : ف كل حاجه ..كنت ممكن تختار حاجه وتقولها !
هو : لا أزاي يعني قوليلي حاجة المحددة
هي : ها طيب هسهلهالك .. اكتر صفه بحبها ف اللي قدامي
هو : (بتساؤل ) انه يكون طيب ؟
هي : امممم .. ايوه أكيد يعنى ما كل الناس بتحب الناس الطيبة ... لا يا عادل انا بحب الصراحة والوضوحهو : ................. ندى انتى غريبة قوي النهاردة
هي : ( في نفسها .. انا برضه اللى غريبه ) ليه و ازاي ؟!هو : بتسألي أسئلة غريبة وملهاش لزوم .. يعنى انا جاي اقعد معاكي ساعتين تقليبهم امتحان
هي : امتحاااان ! آه .. دا انا بسألك حاجه عني مش عنك .. طيب بلاش اسئلة انت عايز نتكلم ف ايه مثلا ..الأهلي بقى كام نقطة ولا حسام حسن هينزل مين الماتش الجاي و البرادعي هيرشح نفسه ولا لأ
هو : صحيح تصدقي دا كان النهارة فيه ماتش للأهلي .. شفتي بقى سبته وجيتلك يا نودي
هي: ( بتريقه ) لا لا ملكش حق يا عادل تسيب الماتش عشاني .. انا مش مهم وبعدين ما انت متعود بتيجي ف أي وقت وحتى مش بتبقى معرفني قبلها عشان حتى اعملك حاجة حلوة تاكلها
هو : اصله بيلعب مع فريق عادي ماتش مش هيبقى حلو ... صحيح عملالي ايه النهاردة حلويات
هي : آه .. عامله كاستر
هو : ايه دا .. انا مش بحب الكاستر خالص
هي : طيب انا مكنتش اعرف
هو : مش تسأليني بتحب ايه ف الاكل عشان تبقى تاخدي بالك وتعمليه
هي : ما انت بتقول على أسئلتي ملهاش لزوم
هو : انتى كنتي بتسأليني أسئلة عاديه .. المفروض تسأليني أسئلة زى بحب إيه ف الأكل عشان تعمليهولي اما نتجوز
هي : ( بضحكة مكتومه "لما بقى" ) عادل انت عارف احنا مخطوبين من كام شهر ؟
هو : من 6 شهور تقريبا
هي : طيب ايه اكتر صفه بحبها ف اللي قدامي؟
هو : (بلا مبالاه وبعد تنهيده ) انه يكون طيب
هي :( تضحك بسخرية) لا والله تصدق بجد بحسبني بحب الناس الشوريرة .. يا عادل والله انا قلتلك انى بحب الصراحة والوضوح
هو : ( بحده ) انتى بتتريقي يا ندى
هي : ( بينها وبين نفسها ... أخيرا فهم حاجه )عادل على فكره انا عارفه عنك تقريبا كل حاجه بتحب ايه ف كل حاجه وبتكره ايه .. بتضايق من ايه بتفرح من ايه بتزعل من ايه .. شغلك ماشي ازاي وقريت عنه عشان اكون فاهمه طبيعة شغلك .. عارفه بتنام امتى وتصحي امتى وبتحب تلبس ايه وايه الاذواق اللى بتعجبك .. عارفه كل اخواتك وولادهم ومعظم اهلك وبسأل على مامتك لما بتروح للدكتور .. وعارفه انك اكتر حاجة بتكرهها ف الحلويات (الكاستر)
هو : مش بقولك انتى غريبه النهاردة ... طيب عملتيه ليه مدام عارفه انى مش بحبه
هي :( هتتجنن خلاص ) هو كل الكلام اللي انا قلته دا مش فارق معاك غير الكاستر
هو : لا طبعا ازاي .. دا انا مبسوط منك قوي انك مهتمه بيا وعارفه كل الحاجات دي وكدا اطمن اني هرتاح ف الجواز ومش هقعد كل شوية اعرفك بحب ايه ومبحبش ايه
هي : يعنى انت شايف ان الحاجات دي مهمه؟
هو : أكييد طبعا
هي : عادل .. انت عارف انا كنت قسم ايه ف الكلية ؟
طيب عارف انا عصبية ولا لأ؟
عارف انا عيد ميلادي امتى ؟
طيب عارف انا عرفت كل حاجة عنك ازاي ؟
هو : ......... لا
هي : طيب يهمك انك تعرف انا بحب اى نوع من الورد .. أو يهمك تعرف انا بفكر ف مستقبلي ازاي ...(بحزن ) دا انا لو شكلي زعلان مش بتقولي مالك وكأنك مش حاسس
هو : ....................... (لا يرد )
" سادت فتره صمت طويله نسبيا "
هي : لو سمحت انا هقول لاهلي ان مفيش نصيب وكفاية لحد كدا
هو :( باستغراب ) عشان يعني مش عارف انتى بتحبي ايه والكلام دا ... طيب ما هو انتى اللى مش بتتكلمي كتير ومش بتعرفيني الحاجات دي قوليلي وانا هعرف
هي : ما هو انت مش بتسمع او بتسمع بس اللى انت عايزة تسمعه
هو :انا بسمع كويس انتى اللى مش بتحبي تتكلمي عن نفسك
هي : ( بنفاذ صبر ) طيب انا ايه اكتر صفه بحبها ف اللي قدامي؟؟؟
هو : ....................... ( لا يرد )
تمت
فراشة
28 فبراير 2010
فراشة
28 فبراير 2010
ليست هناك تعليقات:
إرسال تعليق